Galw am ymchwiliad i agweddau ac arferion sy'n gysylltiedig ag Anghenion Dysgu Ychwanegol mewn awdurdodau lleol yng Nghymru

Mae eisoes yn hysbys o fewn y gymuned anghenion dysgu ychwanegol fod awdurdodau lleol ac ysgolion yn esgeuluso eu cyfrifoldebau i roi darpariaethau digonol i blant ag anghenion dysgu ychwanegol. Mae'r sefydliadau hyn, nid yn unig yn esgeuluso eu dyletswyddau, ond credwn eu bod yn gwneud hynny drwy ddulliau gelyniaethus ymwybodol neu ddulliau trin o ran emosiwn, er mwyn achosi'r gofid mwyaf i rieni/gofalwyr a phlant ag ADY. Mae’r problemau hefyd yn cynnwys: defnyddio iaith enllibus, iaith ymosodol, neu iaith ddiraddiol yn uniongyrchol neu'n gudd tuag at rieni/gofalwyr ADY, yn ogystal ag ymddygiad bygythiol a bwlio drwy gyfathrebiadau gweinyddol (e.e. llythyrau ysgol yn cyrraedd ar benwythnosau i achosi'r gofid a'r aflonyddwch mwyaf i fywyd teuluol).

Mae pawb yn y gymuned ADY yn gwybod am y niwed y mae'r system bresennol yn ei hachosi i deuluoedd, yn enwedig i blant mewn addysg brif ffrwd, ac rydym wedi cael digon ar gael ein tanseilio nes y teimlwn mai ni yw'r broblem. Mae'r system yn ddrylliedig ac mae angen iddi newid, fel bod pob plentyn yn cael addysg deg.