Dylid defnyddio Cymru nid Wales fel yr enw swyddogol ar ein gwlad, a defnyddio un enw yn unig ar gyfer ein henwau lleoedd

Mae safle Cymru ar y llwyfan rhyngwladol yn fach iawn iawn o'i gymharu â'r Alban ac Iwerddon, ond â Llywodraeth newydd mewn grym sy'n edrych tuag allan, mae gennym gyfle i newid hynny.

Mae Twrci a Tsiecia yn enghreifftiau o wledydd sydd wedi newid eu henwau, ac rydym hefyd wedi gweld llwyddiant ein parciau cenedlaethol yn defnyddio enwau Cymraeg ac yn ennill sylw rhyngwladol ehangach.

Cafodd deiseb flaenorol ar y pwnc dros 10,000 o lofnodion ac fe’i hanwybyddwyd gan Lywodraeth Lafur. Roedd y ddeiseb, a grëwyd gan Arfon Jones, yn dweud: Enw sydd wedi ei orfodi ar Gymru yw’r enw ‘Wales’, sydd yn ei hanfod ddim yn air Cymraeg o gwbl. Mae’r byd i gyd bron yn gwybod am Wales oherwydd ei chysylltiad Seisnig a Lloegr ers 1282.

"Nid oes fawr neb yn gwybod am Gymru a bod ganddi iaith a diwylliant unigryw ei hunan sydd yn hollol wahanol i’r gwledydd eraill o fewn y Deyrnas Unedig." Mae gennym gyfle i ailosod, i ailfrandio ac i adnewyddu ein cenedl a'i dinasoedd, ei threfi a’i phentrefi - byddai hyn yn ddechrau hyderus a gobeithiol.